Amravati Crime News : शहरातील कोतवाली पोलीस ठाण्याच्या हद्दीत मंगळवारी रात्री एका अशा घटनेने खळबळ उडाली, जिने प्रत्यक्ष पाहणाऱ्यांच्या काळजाचा ठोका चुकला. एका २१ वर्षीय तरुणावर जुन्या वादातून इतका भीषण हल्ला करण्यात आला की, हल्लेखोरांनी सपासप वार करून दोन चाकू त्याच्या शरीरातच खुपसले. धक्कादायक बाब म्हणजे, मानेत आणि हातात चाकू अडकलेल्या अत्यंत गंभीर अवस्थेत या तरुणाने स्वतःचा जीव वाचवण्यासाठी पळ काढत रुग्णालय गाठले.
नेमकी घटना काय?
सोमेश जुगानी विश्वकर्मा (२१) हा मंगळवारी रात्री ९:३० च्या सुमारास आपल्या मित्रासोबत वॉलकट कंपाऊंडमधील अग्निशमन विभागाच्या आवारात उभा होता. त्याच वेळी तिथे आलेल्या एका अल्पवयीन हल्लेखोराने आपल्या दोन साथीदारांसह सोमेशला घेरले. त्यांच्यात जुन्या वादावरून शाब्दिक चकमक झाली आणि पाहता-पाहता हल्लेखोरांनी सोमेशवर धारदार चाकूने हल्ला चढवला.
दोन चाकू शरीरातच अडकले!
हल्लेखोरांनी सोमेशच्या पाठीवर, हातावर आणि खांद्यावर गंभीर वार केले. हा हल्ला इतका क्रूर होता की, एक चाकू सोमेशच्या मानेत अडकून राहिला, तर दुसरा चाकू त्याच्या हातात खुपसलेला होता. याच रक्ताळलेल्या आणि विदारक अवस्थेत सोमेशने आधी घर गाठले आणि त्यानंतर त्याला जिल्हा सामान्य रुग्णालयात (इर्विन) दाखल करण्यात आले.
डॉक्टरही झाले सुन्न | Amravati Crime News
जेव्हा सोमेशला इर्विन रुग्णालयात आणले गेले, तेव्हा त्याच्या शरीरात अडकलेले चाकू पाहून उपस्थित डॉक्टरांनाही धक्का बसला. परिस्थितीचे गांभीर्य ओळखून डॉक्टरांनी तातडीने त्याच्यावर शस्त्रक्रिया करण्याचा निर्णय घेतला. वैद्यकीय सूत्रांनुसार, सोमेशची प्रकृती अद्यापही अत्यंत नाजूक असून तो मृत्यूशी झुंज देत आहे.
Also Read :अमरावती बसस्थानकात धक्कादायक चोरी! महिलेचे 70 ग्रॅम सोन्याचे दागिने लंपास
पोलीस कारवाई आणि अटक
या प्रकरणी सोमेशच्या बहिणीने दिलेल्या तक्रारीवरून कोतवाली पोलिसांनी वेगाने तपास चक्र फिरवले आहेत. पोलिसांनी या घटनेतील तिन्ही हल्लेखोरांना ताब्यात घेतले असून, त्यापैकी दोघे विधीसंघर्षित बालक (अल्पवयीन) आहेत. विशेष म्हणजे, हल्लेखोरांपैकी एक जण सोमेशच्या जवळचा नातेवाईक असल्याची माहिती समोर आली आहे. सध्या पीएसआय तुषार गावंडे या प्रकरणाचा पुढील तपास करत आहेत.