Tukaram Munde Action Against Gutkha Mafia : महाराष्ट्रात प्रतिबंधित असलेल्या गुटखा, तंबाखू आणि निकोटिनयुक्त पानमसाल्याची बेकायदेशीर विक्री करणाऱ्यांवर आता कायद्याचा सर्वात मोठा बडगा उगारला जाणार आहे. सार्वजनिक आरोग्याचे रक्षण करण्यासाठी आणि या अवैध व्यापाराचे कंबरडे मोडण्यासाठी अन्न व औषध प्रशासन (FDA) आयुक्त तुकाराम मुंढे यांनी एक अत्यंत कठोर आणि ऐतिहासिक निर्णय घेतला आहे.
यापुढे राज्यात संघटितपणे अवैध गुटखा विकणाऱ्या आणि त्याची वाहतूक करणाऱ्या गुन्हेगारांवर थेट ‘मकोका’ (महाराष्ट्र संघटित गुन्हेगारी नियंत्रण अधिनियम) अंतर्गत कारवाई करण्याचे आदेश त्यांनी दिले आहेत.
संघटित गुन्हेगारीला बसणार चाप
गुटखा, सुगंधित तंबाखू, निकोटिनयुक्त पानमसाला तसेच तत्सम तंबाखू-मिश्रित प्रतिबंधित अन्नपदार्थांचे उत्पादन, साठवणूक, वाहतूक, वितरण आणि विक्री करणाऱ्यांच्या टोळ्यांवर अंकुश ठेवण्यासाठी हा निर्णय घेण्यात आला आहे.
तुकाराम मुंढेंच्या आदेशानुसार, प्रतिबंधित अन्नपदार्थांशी संबंधित प्रत्येक कारवाईत अन्न सुरक्षा अधिकारी आणि नामनिर्देशित अधिकाऱ्यांना ‘मकोका’ लागू करण्याची पात्रता तपासणे आता बंधनकारक असेल. पात्रता सिद्ध झाल्यास अन्न सुरक्षा व मानके अधिनियमातील तरतुदींसह थेट मकोका अंतर्गत कारवाई करण्यासाठी पोलिसांशी तातडीने समन्वय साधला जाईल.
Also Read : इंस्टाग्रामवर ‘म्हैस’ खरेदी बेतली महाग! लिंकवर क्लिक करताच बँक खाती रिकामी; अमरावतीत सायबर भामट्यांचा सुळसुळाट.
प्रत्येक जिल्ह्यावर राहणार ‘स्पेशल वॉच’; स्वतंत्र नोंदवही ठेवणार
या मोहिमेत पारदर्शकता आणि कडकपणा आणण्यासाठी प्रत्येक जिल्ह्यात ‘मकोका’ पात्रता, दाखल झालेले गुन्हे, आरोपपत्रे, न्यायालयीन आदेश, जप्ती आणि तपासाच्या स्थितीची इत्थंभूत नोंद ठेवण्यासाठी एक स्वतंत्र नोंदवही ठेवली जाणार आहे.
तसेच राज्य स्तरावर मुख्यालय स्तरावरही एक एकत्रित नोंदवही असेल. सहआयुक्त स्तरावर जिल्हानिहाय अहवालांचा आढावा घेऊन प्रादेशिक अहवाल दरमहा आयुक्तांना सादर करण्याचे स्पष्ट निर्देशही देण्यात आले आहेत.
Also Read : अमरावतीकरांना लुटले! अवघ्या ५ महिन्यांत तब्बल २.२२ कोटींचा सायबर दरोडा; ‘हा’ ठरतोय सर्वाधिक मोठा सापळा.
जनतेसाठी महत्त्वाचे आवाहन | Tukaram Munde Action Against Gutkha Mafia
“तंबाखू आणि गुटखा हे केवळ शरीरालाच नाही, तर संपूर्ण कुटुंबाला कर्करोगाच्या खाईत लोटतात. शासनाने गुटखा माफियांच्या मुसक्या आवळण्यासाठी कठोर पावले उचलली आहेत, परंतु एक समाज म्हणून आपणही या व्यसनापासून दूर राहिले पाहिजे.
आपल्या परिसरात कुठेही अवैध गुटखा विक्री होत असल्यास प्रशासनाला नक्की माहिती द्या आणि व्यसनमुक्त महाराष्ट्र घडवण्यास मदत करा!”
व्हॉट्सॲप ग्रुपला जॉईन करा
अशाच नवनवीन शासकीय निर्णय, गुन्हेगारी विश्वातील घडामोडी आणि महाराष्ट्रातील ताज्या बातम्यांचे अपडेट्स थेट तुमच्या मोबाईलवर मिळवण्यासाठी आजच आमच्या व्हॉट्सॲप ग्रुपला जॉईन करा.