Amravati : शहरात महिला सुरक्षेचा प्रश्न पुन्हा एकदा अत्यंत ऐरणीवर आला आहे. नोकरीच्या शोधात असलेल्या एका अवघ्या १८ वर्षीय तरुणीला जाळ्यात ओढून तिच्यावर अत्याचार केल्याची एक खळबळजनक आणि माणुसकीला काळीमा फासणारी घटना उघडकीस आली आहे.
याप्रकरणी फ्रेजरपुरा पोलीस ठाण्यात दोन महिलांसह एकूण चार जणांविरुद्ध भारतीय न्याय संहिता (BNS) आणि अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी) गुन्हा दाखल करण्यात आला आहे. २ जून रोजी सकाळी हा संपूर्ण धक्कादायक प्रकार उघडकीस आला असून पोलिसांनी दोन महिला व दोन पुरुष आरोपींना तातडीने अटक केली आहे.
ओळखीचा फायदा घेत रचला कट | Amravati
मिळालेल्या माहितीनुसार, पीडित तरुणी नोकरी शोधत असताना तिची ओळख सायमा (वय २६) नावाच्या महिलेशी झाली होती. अमरावती येथे कामाचा शोध घेत असताना एका ठिकाणी काही मुलांची नजर संशयास्पद वाटल्याने पीडितेचा सायमासोबत वाद झाला होता. त्यामुळे पीडिता सायमाची मैत्रीण रीतू ही हिच्याकडे वास्तव्यास गेली होती.
१ जून या तारखेला रात्री रीतूने पीडितेची दिशाभूल करत तिला बाहेर खाण्याच्या बहाण्याने घराच्या बाहेर नेले. तिथे आधीच दबा धरून बसलेल्या सायमाने पीडितेला एका ठिकाणी सोबत चालण्यास सांगितले.
पीडितेने या सर्व प्रकाराला स्पष्ट नामंजुरी दिली असता, तिला मारून टाकण्याची धमकी देण्यात आली आणि जबरदस्तीने मोटरसायकलवर बसवून पळवून नेण्यात आले.
रात्रभर डांबून ठेवले; शस्त्राच्या बळावर गुन्हा!
आरोपींनी पीडितेला मारहाण करत आणि चाकूचा धाक दाखवत महादेवखोरी परिसरातील एका बंद घरात नेले. तिथे सायमाने पीडितेला जबरदस्तीने डांबून ठेवले आणि तिथे हजर असलेल्या गोलू (वय २६) व करण (वय २७) या दोन नराधमांच्या ताब्यात दिले.
“तुम्ही रात्रभर हिच्यासोबत राहा, मी सकाळी येते,” असे म्हणून सायमा आणि रीतू तिथून निघून गेल्या.
यानंतर त्या दोन्ही पुरुषांनी पीडितेला गंभीर धमकी देऊन तिच्यावर अत्याचार केला. १ जून रोजी रात्री ८ वाजल्यापासून ते २ जून रोजी पहाटे ४ वाजेपर्यंत हा सर्व थरारक छळ सुरू होता.
अशी झाली पीडितेची सुटका; नागरिकांनी पोहोचवले ठाण्यात
पहाटेच्या सुमारास संशयित आरोपींचे काही काळ दुर्लक्ष होताच, पीडितेने अत्यंत धैर्याने घराच्या मागील दाराने स्वतःची सुटका करून घेतली. स्वतःचा जीव वाचवण्यासाठी तिने रात्रभर परिसरात प्रचंड भटकंती केली.
२ जून रोजी सकाळी परिसरात फिरत असलेल्या या पीडितेला काही सुजाण नागरिकांनी पाहिले. तिची विदारक अवस्था पाहून नागरिकांनी तिला तातडीने राजापेठ पोलीस ठाण्यात पोहोचवले.
राजापेठ पोलिसांनी घटनेचे गांभीर्य ओळखून पीडितेला तात्नीक उपचारासाठी व वैद्यकीय तपासणीसाठी जिल्हा सामान्य रुग्णालयात दाखल केले. हा गुन्हा फ्रेजरपुरा पोलीस ठाण्याच्या हद्दीत घडल्याने तिथे गुन्हा वर्ग करण्यात आला.
शहर गुन्हे शाखेचे प्रमुख संदीप चव्हाण यांच्या नेतृत्वात पोलिसांनी वेगाने चक्रे फिरवून दोन्ही पुरुष आरोपींना आणि त्यांना साथ देणाऱ्या दोन्ही महिलांना बेड्या ठोकल्या आहेत. दोन महिलांनीच एका तरुणीला नराधमांच्या स्वाधीन केल्याने संपूर्ण शहरात तीव्र संताप व्यक्त होत आहे.