Amravati Marriage Tragedy : नियतीचा खेळ किती क्रूर असू शकतो, याचा प्रत्यय अमरावती जिल्ह्यातील आसेगाव पूर्णा येथे आला आहे. ज्या घरात चार दिवसांपूर्वी सनई-चौघड्यांचे सूर घुमत होते, जिथे लग्नाच्या अक्षता पडल्या होत्या, त्याच घरातून आता नवदेवाचा अंत्यविधी काढण्याची वेळ आली आहे. लग्नानंतरच्या स्वागताची तयारी सुरू असतानाच, काळजाचा थरकाप उडवणारी ही घटना घडली आहे।
सुखी संसाराचे स्वप्न अधुरेच
संकेत सुभाषराव वसू (वय २८) असे या दुर्दैवी तरुणाचे नाव आहे. संकेत हा उच्चशिक्षित असून आसेगाव येथे त्याचा प्रिंटिंगचा व्यवसाय होता. १० मे रोजी त्याचा विवाह चांदूर बाजार येथे मोठ्या उत्साहात पार पडला. ११ मे रोजी आसेगावात भव्य रिसेप्शन देऊन पाहुण्यांचे स्वागत करण्यात आले. घरात नवीन सून आल्यामुळे वसू कुटुंबात आनंदाचे वातावरण होते. मात्र, गुरुवारी दुपारच्या वेळी अचानक संकेतच्या छातीत दुखू लागले आणि आनंदाचे रूपांतर क्षणात दुःखात झाले।
अवघ्या १६ तासांत हरपले सौभाग्य | Amravati Marriage Tragedy
नवे संसाराचे स्वप्न डोळ्यात घेऊन संकेतची पत्नी अवघ्या दोन दिवसांच्या माहेरपणानंतर गुरुवारी सासरी परतली होती. सासरी तिचे स्वागत करण्यासाठी पाहुणेमंडळी जमलेली होती. मात्र, संकेतला अचानक हृदयविकाराचा झटका आला. त्याला तातडीने स्थानिक डॉक्टरांकडे आणि त्यानंतर अमरावती येथे हलवण्यात आले, पण उपचारापूर्वीच त्याची प्राणज्योत मालवली. लग्नाची मेहंदी अजून हातावर तशीच असताना अवघ्या १६ तासांत या नववधूचे सौभाग्य हिरावले गेले।
ज्या अंगणात नाचले, तिथेच अश्रूंचा महापूर
वसू कुटुंबातील हे शेवटचे लग्न असल्याने संपूर्ण परिसरात मोठा उत्साह होता. वरातीत मित्र आणि नातेवाईक आनंदाने नाचले होते. मात्र, गुरुवारी रात्री जेव्हा संकेतवर पूर्णा नदीच्या तीरावर अंत्यसंस्कार करण्यात आले, तेव्हा उपस्थित असलेल्या प्रत्येकाचा कंठ दाटून आला होता. हातावरची हळदही नीट उतरली नव्हती, तोच संकेतवर काळाने झडप घातल्याने संपूर्ण आसेगाव परिसर सुन्न झाला आहे।
Also Read : अमरावतीत मध्यरात्री तरुणाची हत्या; पैशांच्या वादातून भरचौकात चाकू हल्ला
संकेतच्या पश्चात आई-वडील, मोठा भाऊ, वहिनी आणि दोन दिवसांपूर्वीच पत्नी झालेली नववधू असा परिवार आहे. या घटनेने परिसरात हळहळ व्यक्त केली जात असून, सोशल मीडियावरही या दुर्दैवी घटनेची मोठी चर्चा सुरू आहे।
वाचकहो, ही बातमी शेअर करून या दुर्दैवी कुटुंबाप्रति आपल्या संवेदना व्यक्त करा।