Wardha Heat Wave Alert : एकीकडे सूर्याचा प्रकोप आणि दुसरीकडे विजांच्या कडकडाटासह कोसळणारा मुसळधार पाऊस… निसर्गाच्या या अत्यंत लहरी आणि चमत्कारिक रूपाचा थरार नुकताच वर्धा जिल्हावासीयांनी अनुभवला आहे. आधीच कडक उन्हाने होरपळणाऱ्या नागरिकांना गुरुवारी एकाच दिवसात कमालीच्या दोन टोकाच्या हवामानाचा सामना करावा लागला. दुपारपर्यंत अंगाची लाहीलाही करणाऱ्या उष्णतेमुळे प्रशासनाकडून आपत्कालीन संदेश जारी करण्यात आला, मात्र सायंकाळ होताच निसर्गाने असा काही पलटी मारली की संपूर्ण जिल्ह्याची चांगलीच तारांबळ उडाली.
मोबाईलच्या त्या एका आवाजाने नागरिकांचा उडाला थरकाप!
बुधवारी आणि गुरुवारी दुपारच्या सुमारास वर्धा जिल्ह्यातील नागरिकांच्या मोबाईलवर अचानक एक विचित्र आणि मोठा ‘बीप’ असा सायरन वाजला. हा आवाज ऐकून सुरुवातीला अनेकांचा थरकाप उडाला. शासनाच्या आपत्ती व्यवस्थापन विभागाकडून थेट तांत्रिक यंत्रणेचा वापर करून नागरिकांना सतर्कतेचा आपत्कालीन संदेश (Emergency Alert) पाठवला गेला होता.
पुढच्या काही तासांमध्ये तीव्र उष्णतेची लाट (Heat Wave) येणार असल्याने नागरिकांनी कमालीची काळजी घ्यावी आणि घराबाहेर पडणे टाळावे, असे आवाहन दिलेल्या संदेशात करण्यात आले होते.
यामुळे सर्वत्र चिंतेचे आणि भीतीचे वातावरण निर्माण झाले होते.
…आणि सायंकाळी निसर्गाने फिरवला फासा!
नागरिक दुपारी तीव्र उन्हाच्या आणि उष्णतेच्या लाटेचा सामना करण्यासाठी मानसिकदृष्ट्या सज्ज होत असतानाच, सायंकाळच्या वेळी हवामानात कमालीचा आणि अनपेक्षित बदल झाला. अवकाशात अचानक काळेकुट्ट ढग जमा झाले आणि संपूर्ण जिल्ह्याला सोसाट्याच्या वादळी वाऱ्याने घेरले. काही वेळातच विजांच्या कडकडाटासह अवकाळी पावसाने जोरदार हजेरी लावली.
या अचानक आलेल्या संकटामुळे जिल्ह्यातील अनेक भागांत मोठे नुकसान झाले. सोसाट्याच्या वाऱ्यामुळे अनेक ठिकाणी अजस्र झाडे उन्मळून पडली, तर काही घरांची छप्परे हवेत उडून गेली. या वादळी पावसाचा सर्वाधिक फटका सेलू, देवळी आणि वर्धा तालुक्याला बसला असून, शेतकऱ्यांच्या पिकांचे अतोनात नुकसान झाले आहे.
तापमानाचा पारा घसरला, पण ‘हायटेक अलर्ट’वर प्रश्नचिन्ह! | Wardha Heat Wave Alert
मागील काही दिवसांपासून सतत ४५ अंशांच्या पार गेलेले जिल्ह्याचे तापमान या अवकाळी पाऊस आणि गार्यांमुळे गुरुवारी थेट ४६.८ अंशांवरून घसरले, तर शुक्रवारी ४४.५ अंश सेल्सिअस इतके नोंदवले गेले. तापमान कमी झाल्याने हवेत काहीसा गारवा निर्माण झाला असला, तरी हवामान खात्याच्या अंदाजावर आता नागरिकांमधून तीव्र प्रश्नचिन्ह उपस्थित केले जात आहे.
दुपारी उष्णतेच्या तीव्र लाटेचा इशारा दिला गेलेला असताना थेट त्याच्या उलट परिस्थिती निर्माण होऊन मुसळधार पाऊस पडल्यामुळे, शासनाचा हा ‘हायटेक अलर्ट’ नेमका कसा काय फेल ठरला? अशी उलटसुलट चर्चा आता सोशल मीडियासह संपूर्ण जिल्ह्यात रंगू लागली आहे. आधुनिक तंत्रज्ञान वापरताना अंदाज अधिक अचूक असणे गरजेचे आहे, अशी संतप्त प्रतिक्रिया सामान्य जनतेतून उमटत आहे.