Nagpur Dowry Case : परदेशात जाऊन आधुनिक जीवनशैली जगणारे, उच्चशिक्षित आणि आर्थिकदृष्ट्या सक्षम असणारे लोक समाजासाठी आदर्श मानले जातात. मात्र, शिक्षण आणि पैसा मिळाला तरी अनेकांचे विचार किती बुरसटलेले असतात, याची प्रचिती देणारी एक धक्कादायक आणि संतापजनक घटना नागपुरात उघडकीस आली आहे.
सुखी संसाराची स्वप्ने उराशी बाळगून कॅनडाला गेलेल्या एका तरुणीला तिथे हुंड्यासाठी मानसिक छळ, अपमान आणि आर्थिक शोषणाचा सामना करावा लागला. अखेर मानसिकदृष्ट्या खचलेल्या या पीडित महिलेने नागपुरात परत येऊन पोलिसांत धाव घेतली असून पती, सासू-सासरे आणि एका महिला नातेवाईकाविरुद्ध गुन्हा दाखल केला आहे.
सुरुवात झाली लग्नातील ‘स्त्रीधना’वर डल्ला मारण्यापासून!
या तरुण पिढीत महिलेचे लग्न २०२३ मध्ये नीरज नावाच्या व्यक्तीसोबत झाले होते. लग्नावेळी मुलीच्या माहेरच्यांनी ऐपतीप्रमाणे सोन्या-चांदीचे दागिने, डायमंडचे दागिने आणि इतर मौल्यवान वस्तू दिल्या होत्या.
मात्र, लग्न उरकताच सासू-सासऱ्यांनी “हे दागिने बँकेच्या लॉकरमध्ये सुरक्षित ठेवतो,” असे खोटे सांगून मुलीचे सर्व स्त्रीधन आपल्या ताब्यात घेतले. यात सोन्याच्या बांगड्या, पाटल्या, नेकलेस, अंगठ्या आणि डायमंड ब्रेसलेटसह तब्बल १४ तोळ्यांपेक्षा जास्त दागिने होते.
कॅनडात पाऊल ठेवताच छळाचा थरार; सातत्याने ‘बॉडी शेमिंग’
पीडित महिला पतीसोबत संसार करण्यासाठी भारतातील तिची चांगल्या पगाराची नोकरी सोडून कॅनडाला गेली होती. मात्र तिथे पोहोचताच पती आणि सासरच्यांचे खरे रूप समोर आले.
शारीरिक आणि मानसिक अपमान:
“तुझे वजन खूप जास्त आहे, तू माझ्या लायकीची नाहीस,” असे म्हणत पतीने तिचे सातत्याने ‘बॉडी शेमिंग’ करून छळ सुरू केला.
नियमबाह्य कामासाठी दबाव: Nagpur Dowry Case
वाईट गोष्ट म्हणजे, तरुणीकडे कॅनडाचे वर्क परमिट नसतानाही तिला पेट्रोल पंप व इतर ठिकाणी बेकायदेशीर काम करण्यासाठी भाग पाडले जात होते. कॅनडाच्या कायद्यानुसार हे पूर्णपणे अवैध असल्याने महिला प्रचंड मानसिक तणावाखाली होती.
आर्थिक नाकेबंदी:
“तुझा खर्च तूच कर, कर्ज घे किंवा माहेरून पैसे माग,” असे म्हणत पतीने तिचे एटीएम कार्ड, चेकबुक आणि घराच्या चाव्याही काढून घेतल्या. इतकेच नव्हे, तर तिच्या संमतीशिवाय तिचा पीआर (PR) आणि वर्क परमिटचा अर्ज मागे घेऊन तिला जबरदस्तीने भावाकडे भारतात पाठवून दिले.
हुंडाबळी आणि मानसिक छळ ही केवळ गरिबांपुरती किंवा अशिक्षितांपुरती मर्यादित राहिलेली कीड नाही
सातासमुद्रापार, अगदी कॅनडासारख्या प्रगत देशात राहूनही जर उच्चशिक्षितांची विचारसरणी अशीच कुजलेली असेल, तर आपल्या शिक्षण पद्धतीवर प्रश्नचिन्ह निर्माण होते. कोणत्याही सुशिक्षित महिलेने सासरचा जुलूम शांतपणे सहन करू नये. अत्याचाराविरोधात वेळीच आवाज उठवणे हाच अशा विकृत प्रवृत्तींना खरा धडा आहे.