Yavatmal Job Fraud : बेरोजगारीच्या काळात सरकारी नोकरी मिळवण्यासाठी तरुण कोणत्याही थराला जाण्यास तयार असतात, मात्र याच हतबलतेचा फायदा घेणारे भामटे समाजात मोकाट फिरत आहेत. अशीच एक धक्कादायक घटना यवतमाळ जिल्ह्यातील घाटंजी येथे समोर आली आहे. ‘अन्न व नागरी पुरवठा विभागात’ सरकारी नोकरी लावून देतो, असे खोटे आमिष दाखवून एका सुशिक्षित तरुणाकडून चक्क ६ लाख ५ हजार रुपये उकळल्याचा प्रकार उघडकीस आला आहे.
‘राजकीय वशिल्या’चा बनाव
तक्रारदार तरुण, अनिकेत देविदास तामगाडगे (वय २८, रा. कुऱ्हाड, ता. घाटंजी), हा बी.एड. चे शिक्षण घेत असतानाच नोकरीच्या शोधात होता. सन २०२३ मध्ये एका परिचयातील महिलेच्या माध्यमातून त्याची ओळख आरोपी विलास सुदाम मगरे (वय ४०, रा. देवळी, जि. छत्रपती संभाजीनगर) याच्याशी मोबाईलद्वारे झाली. आरोपीने बनाव रचला की, त्याचे प्रभावशाली राजकीय व्यक्तींशी जवळचे संबंध आहेत आणि तो वशिल्याने सरकारी नोकरी लावून देऊ शकतो.
६ लाखांचा ‘चुना’ आणि आरटीजीएस व्यवहार | Yavatmal Job Fraud
भामट्याने अनिकेतला ‘अन्न पुरवठा निरीक्षक’ या मानाच्या पदावर रुजू करण्याचे आमिष दाखवले. त्यासाठी ३० लाख रुपये खर्च येईल, असे सांगत ५ लाख रुपये आगाऊ (Advance) स्वरूपात मागितले. २५ जानेवारी २०२४ रोजी आरोपी अनिकेतच्या घरी आला आणि त्याने ५ लाख रुपये आरटीजीएस (RTGS) द्वारे स्वीकारले. त्यानंतर वेगवेगळ्या कारणांचे बनाव रचून आणखी १ लाख ५ हजार रुपये स्वतःच्या आणि भावाच्या फोन-पे (PhonePe) खात्याद्वारे उकळले.
Also Read : जिल्ह्यात ‘रेन अलर्ट’ ॲपचा धमाका; वीज पडण्यापूर्वीच मिळणार धोक्याचा इशारा
दोन वर्षे उलटली, नोकरी नाहीच!
लाखो रुपये देऊन दोन वर्षे उलटून गेली, तरी अनिकेतला नोकरीचे आदेश मिळाले नाहीत. आरोपी टाळाटाळ करू लागल्याने अनिकेतला आपली फसवणूक झाल्याचे लक्षात आले. अखेर त्याने घाटंजी पोलीस ठाण्यात धाव घेऊन तक्रार दाखल केली. ठाणेदार केशव ठाकरे यांच्या मार्गदर्शनात पोलीस उपनिरीक्षक विनास जाधव या प्रकरणाचा पुढील तपास करत आहेत.
सरकारी नोकरीसाठी कोणत्याही व्यक्तीला पैसे न देण्याचे आवाहन प्रशासनाकडून करण्यात आले आहे. या घटनेमुळे बेरोजगार तरुणांमध्ये पुन्हा एकदा भीतीचे वातावरण पसरले आहे.
अशाच नवनवीन बातम्या आणि सविस्तर माहितीसाठी आमच्या वेबसाइटला भेट देत राहा.